ROXAS CITY – Naghatag sang 11 ka sako sang bugas si Mayor Henry Tumlos bilang pauna nga bulig sa mga manugbalas nga apektado sang pagsuspende sang quarry operation sa banwa sang Pontevedra.
Sa pakig-angut sang Bombo Radyo kay Mayor Tumlos suno diri, natigayon nga makabaton ang 108 ka mga benepisaryo sang nasambit nga bugas kag ginasiguro sini nga indi ini ang katapusan nga bulig gikan sa LGU.
Maga-organisa ang LGU sang Livelihood program para sa mga manugbalas nga nadulaan sang pangabuhian kag mahimo sini nga mapili ang luyag sini nga sahi sang livelihood.
Suno kay Mayor Tumlos, magahatag sang P5,000-P10,000 ang munisipyo agud sa pagmentinar sang ila napilian nga pangabuhian.
Nagapati ang alkalde nga indi dapat pagbalewalaon ang mga manugbalas kag kinahanglan nga buligan sang gobyerno bangud makabig na ini nga ‘less fortunate’.
