ROXAS CITY – Ginkalipay sang alkalde sang banwa sang Jamindan nga ang pag-negatibo na sa coronavirus disease (COVID-19) sang 45 anyos nga lalaki nga residente sang nasambit nga banwa nga amo ang pinakauna nga COVID-19 positive sa probinsiya sang Capiz.
Ginkumpirmar ni Mayor Mac Arthur Valdemar nga ang pamilya sang nasambit nga pasyente kag iban pa nga mga nakasalamuha sini ang ginkakas na sa listahan sang (PUI’s) kag (PUM’s) matapos nga natapos ang 14-day quarantine kag wala sila sang may nabatyagan nga sintomas sang nasambit nga balatian.
Samtang ginakasubo sang nasambit nga alkalde nga may yara sang panibag-o nga isa ka PUI kag siyam ka mga PUM’s nga isa ka pamilya nga ginamonitor sang munisipyo.
Suno sa kay Valdemar, isa persona nga gikan sa luwas sang pungsod ang ginsip-on sang adlaw nga nag-abot ini sa Capiz apang lima na ka adlaw ang nakaligad nga wala na ini sang nabatyagan nga anuman nga sintomas.
Ginpasalig naman sang alkalde nga maid-id nga ginamonitor sang Rural Health Unit ang PUI kag mga himata sini nga PUM’s sa sulod sang duha ka semana.
