Nagapati si Terry Ridon nga ang mayorya sang mga miyembro sang House Committee on Justice ang magaboto agud ideklarar nga may “probable cause” ang mga impeachment complaint batok kay Sara Duterte.
Suno kay Ridon, indi na lamang “smoking gun” ang mga ebidensya kundi ginlaragway niya ini bilang “Nuclear Bomb”, matapos ginbuyagyag sang Anti-Money Laundering Council ang gin-alegar kahina-hinala nga transaksyon nga nagaabot sa ₱6.7 bilyon nga may kaangtanan sa Bise Presidente kag iya pamilya.
Nakatakda ipatuman ang masunod kag posible katapusan nga pagdinig sa Abril 29, kun sa diin pagatalakayon pa ang nabilin nga mga reklamo, lakip na ang alegasyon sang pagpanghulga batok kanday Ferdinand Marcos Jr., Liza Araneta Marcos, kag Ferdinand Martin Romualdez.
Ginalauman man ni Ridon nga aaprubahan sang Kamara ang committee report nga magarekomendar sang impeachment kag makuha ang kinahanglang numero sang boto agud mapasa ini sa Senado.
Samtang, suno kay Gerville Luistro, mahimo ipatuman ang botohan sa isyu sang “Probable Cause”, matapos ang pagdinig kun wala na sang may mag-request sang dugang nga adlaw para sa hearing.
