ROXAS CITY – Ginhatagan sang paathag sang Municipal Disaster Risk Reduction and Management Officer sa banwa sang Cuartero ang reklamo sang isa ka Locally Stranded Individual (LSI) gikan sa Iloilo nga ginpalab-ot sa Bombo Radyo angut sa ginaalegar ginateniran nga quarantine facility sa Barangay Poblacion Tacas, Cuartero Capiz.
Ginpahayag ni Mr. Ronald Guillermo nga indi quarantine facility ang ginteniran sang isa ka LSI kundi abandonado nga balay nga ginrekomendar mismo sang iya nga pamilya.
Ginapanindugan ni Guillermo nga wala sang proper coordination ang nasambit nga LSI sa diin nakibot na lamang sang gin-imporma nga yara na ini sa Cuartero.
Ginkunsidera na lamang kuntani nga ipaidalum ini sa home quarantine, apang indi pagbatunon sang iya pamilya bangud may yara sang mga kabataan kag tigulang sa amo nga balay.
Bangud diri ginpatenir na lamang ang nasambit nga LSI sa isa ka abandonado nga balay ba-se man sa rekomendasyon sang iya pamilya nga malapit man sa ila nga balay.
Aminado man si Guillermo nga wala gin-impon ang amo nga LSI sa naka-quarantine nga mga OFWs.
