ROXAS CITY – Wala na sang vital sign, ang duha ka persona nga ginapahayag nadisgrasya-patay matapos naaksidente sa ginasakyan nga motorsiklo sa Barangay Sto. Angel, Dumalag Capiz takna 10:00 kagab-i Oktobre 13, 2023 sang magresponde ang katapo sang Dumalag Municipal Disaster Risk Reduction Management Office (MDRRMO).
Sa interview sang Bombo Radyo kay Mr. Jovil Dacutan, Head sang Dumalag MDRRMO, ginpahayag sini nga takna 10:20 sang gab-i sang nasambit nga petsa sang nakabaton sila sang report kung sa diin may nagluntad nga aksidente sa lugar.
Suno kay Dacutan, gilayon nila ini ginpadulungan agud respondihan antes ginpadangat sa pinakamalapit nga ospital.
Mahibaluan nga nag-angkon sang patal nga mga pilas ang biktima sa nagkalain-lain nga parte sang ila lawas nga nagapang-edaron 32-anyos kaupod ang menor de edad.
Ginpapahayag nga posible nagtupa ang mga ini sa dalan kag nag-igo sa poste sang kuryente antes nga nahulog sa uyapad.
Antes paman suno diri natabo ang aksidente, nagikan ang mga biktima sa banwa sang Dumalag agud magkaon kaupod ang ila mga abyan.
Sa karun, padayon pa ang pagpatigayon sang imbestigasyon sang mga otoridad angut sa nasambit nga insidente.
