ROXAS CITY – Ginklaro sang Municipal Disaster Risk Reduction and Management Office (MDRRMO) Sapian nga una sila nagresponde kaupod ang katapo sang BFP -Sapian sa nagluntad nga sunog kahapon nga adlaw sa Barangay Poblacion banwa sang Sapian.
Sa interview sang Bombo Radyo kay Mrs. Almira Cordova, tagpamuno sang Sapian MDRRMO, suno diri gilayon nagresponde ang iya mga tinawo sang nabaton ang report kag madasig nakapadulong bangud malapit lang ang sunog sa ila edipisyo.
Ginpanginwala niya ang ginatuad sang pila ka pumuluyo nga ulihi sila nakaresponde kag ginalantaw nga rason sini bangud wala nakita ang ila firetruck sa facebook live ukon video nga kuha man sang pumuluyo bangud yara sila sa kilid sang Aglipay Church kag masako sa pagtapna sang kalayo.
Suno kay Cordova, madasig naubos ang tubig bangud sa kagamayon sang ila firetruck gani gintughungan pa nila ini sang tubig para sa ikaduwa nga pagbasya kag gin-instruksyunan niya ang iya tinawo nga magpangayo bulig sa Ivisan kag Mambusao BFP.
Nagbulig man suno diri ang katapo sang BFP Roxas bangud nangin madasig ang paglapta sang kalayo kun sa diin human sa mixed materials ang balay nga nasunog kag mabaskog ang hangin, maayo nalang suno diri nga nag-ulan.
Ginsiling pa ni Cordova nga igapahamtang pa lamang ang BFP station sa ila banwa kag apisar gamay ang ila firetruck, gintul-id sini nga preparado ang MDRRMO sa tion sang sunog kag kun magpangayo bulig ang iban nga kabanwahanan bangud piyerme nila ginatsekyar ang firetruck kag ginasiguro nga ‘fulltank’ ang gasolina ilabi na ang tubig.
Luyag sini ipalab-ot sa pumuluyo nga likawan nalang maghaboy sang malain nga komento batuk sa ila bangud masakit ini sa ila bahin kun sa diin ginahimo nila ang tanan nga pagsakripisyo apang kasubong nga sila pa ang ginabasol sa wala ginaekspektar nga sunog.
