Naglab-ot sa masobra 290,000 metric tons ang meat imports sang Pilipinas sa una nga duha ka bulan sang 2026, suno sa Bureau of Animal Industry. Naglab-ot ini sa 292,105 MT, nga mas mataas sang 23% kun ipaanggid sa kapareho nga panahon sang tinalikdan nga tuig.
Nagapanguna sa gihapon ang baboy sa mga gin-import nga karne nga may 151,788 MT ukon 52% sa kabilugan, kasunod ang manok nga naglab-ot sa 98,926 MT matapos nagtaas sang 28%. Nadugangan man sang gamay ang beef imports, samtang sobra pa sa doble ang gintaas sang buffalo meat imports.
Suno sa Department of Agriculture, padayon ang pag-import agud maaksyunan ang mataas nga demand sa tunga sang kakulangan sa lokal nga produksyon kag pagtaas sang presyo sang gatong tuga sang krisis sa Middle East.
Samtang, nagapabilin ang Brazil nga nagapanguna nga ginahalinan sang imported meat sang pungsod, kasunod ang United States, Spain, Australia, kag Canada.
