Nagpahanumdom ang isa ka medical expert sa importansya sang papel sang mga ospital kag healthcare workers sa paghatag sang dekalidad nga serbisyo para sa ikaayong lawas sang publiko, kadungan sang pagselebrar sang National Hospital Week sa pungsod.
Sa interview sang Bombo Radyo kay Dr. Ian P. Arciga, sang Bailan District Hospital kag President sang Philippine Hospital Association–Capiz Chapter, iya ginpahayag nga ang National Hospital Week isa ka oportunidad agud kilalahon kag pasalamatan ang mga healthcare workers nga nagaserbisyo sa mga ospital kag nagaatipan sa mga pasyente.
Suno kay Arciga, indi lamang mga doktor kag nurse ang importante sa operasyon sang isa ka ospital, kundi lakip man ang mga medical technologist, pharmacist, radiologic technologist kag iban pa nga healthcare professionals nga nagatrabaho bilang isa ka team.
Pahayag pa niya, importante ang teamwork sa sulod sang ospital agud masiguro ang husto, madinalag-on kag madali nga pag-atipan sa mga pasyente, ilabi na sa tion sang emergency kag mga kalamidad.
Nagpanawagan man ang natungdan sa publiko nga suportahan kag respetuhon ang mga healthcare workers kag kilalahon ang importante nga papel sang mga ospital sa healthcare system sang pungsod.
