Nagpahanumdom ang isa ka medical expert sa importansya sang husto nga Infection Prevention and Control (IPC) bilang isa sa pinakaepektibo nga paagi agud mapunggan ang paglapta sang impeksyon sa mga ospital, komunidad kag sa tagsa ka panimalay.
Sa interview sang Bombo Radyo kay Dr. Joy . Señeres, Adult Infectious Diseases Specialist kag miyembro sang Philippine Society for Microbiology and Infectious Diseases (PSMID), iya gin pahayag nga kabahin sang pagsaulog sang National Infection Prevention and Control Week, ginpahayag sini nga ang IPC amo ang mga simple pero epektibo nga mga pamaagi kaangay sang husto nga paghugas sang kamot, pagsuksok sang mask kon may balatian, maayo nga bentilasyon, regular nga paglimpyo sang palibot kag insakto nga pagdumala sang mga basura.
Suno kay Señeres, ang pagsunod sa sini nga mga pamaagi importante agud maprotektahan indi lamang ang mga pasyente kundi pati ang mga healthcare workers, mga bisita kag ang bug-os nga komunidad batok sa nagkalain-lain nga makatakod nga sakit.
Ginpahayag man niya nga kinahanglan ang responsableng paggamit sang antibiotics bangud ang indi husto nga paggamit sini mahimo magresulta sa antimicrobial resistance, kun sa diin ang mga bakterya nagaresistensya na sa bulong kag nagapabudlay sa pagtambal sang impeksyon.
Dugang pa niya, importante man ang padayon nga pag-monitor sang antimicrobial resistance kag ang pagsunod sa transmission-based precautions sa mga health facilities agud malikawan ang paglapta sang impeksyon sa sulod sang mga ospital.
Ginpahanumdom man ni Dr. Señeres ang publiko nga likawan ang self-medication kag magpakonsulta gilayon sa doktor kon nagapadayon ukon nagagrabe ang sintomas sang balatian.
Nagpanawagan man siya sa mga pasyente kag ila mga pamilya nga magbuligay sa pagsunod sang mga health protocols kon nagabisita sa ospital ukon naga-atipan sang masakiton sa balay agud malikawan ang paglapta sang impeksyon.
