ROXAS CITY – Ginkumpirma sang Development Management Officer IV sang Department of Health (DOH) Capiz nga una nga mahatagan sang Sinovac vaccine ang mga frontliners sang Roxas Memorial Provincial Hospital.
Ginpahayag ni Mr. Joeffrey Espiritu nga ba-se sa guidelines ukon pagsulundan prayoridad ang mga medical frontliners nga nagatatap sa mga covid patients agud masiguro nga mahatagan sila sang proteksyon.
Sa pag-abot sang sinovac vaccines, iga-diretso ini sa storage facility sang RMPH.
Gin-athag ni EspiriTu prayoridad ang RMPH bangud ini ang nagaserbe nga covid-19 referral hospital, gani nagakadapat lamang nga unahon sila nga mabakunahan agud maproteksyunan indi lamang ang ila kaugalingon kundi kalakip man ang mga tawo sa ila palibot.
Nasiguro man sini nga handa na ang mga frontliners sang amo nga ospital para sa pagturok sa ila sang bakuna sa masunod nga mga inadlaw.
Dapat lima tobtob pito ka adlaw sa pag-abot sang vaccine, mapatigayon na ang vaccination sa mga medical frontliners agud madugangan ang vaccine nga ginpadala sang DOH.
Aminado man si Espiritu nga pila sa mga rason nga nakalab-ot sa iya nga nagapang-alang alang sa pagpa-inject sang sinovac vaccine ang mga pumuluyo, bangud bag-o ini nga bakuna kag nagapadayon pa ang pagtuon diri kag nagtuga sang kahadluk ang ila nabatian nga adverse effect sang bakuna.
Apang kun tan-awon indi man pagpahanugutan sang gobyerno nga batunon ang nasambit nga bakuna, kun ila nakita nga manubo ang efficacy rate sini.
Mas gina-una sang gobyerno nga masiguro kag maproteksyunan ang mga pumuluyo sa makahalalit nga covid-19.
Ginklaro man ni Espiritu nga indi buot siling kun magpa-vaccinate sang anuman nga bakuna kontra sa covid-19, indi na ini malatnan sang amo nga balatian.
Suno sa opisyal nga mahimo sa gihapon malatnan sang coronavirus disease, apang kun nabakunahan na mapahagan hagan ini kag indi mangin severe ang madangatan sang isa ka indibidwal.
Samtang handa nga magpabakuna si Espiritu agud makaangkon man ini sang proteksyon.
