Nagpahanumdom ang isa ka medical practitioner sa importansya sang National Breastfeeding Awareness Month agud mahatagan sang ihibalo ang mga iloy sa mga benepisyo sang breast milk.
Sa interview sang Bombo Radyo kay Dr. Edrea Velda Yeoh sang Tapaz District Hospital, ia ginpahayag nga importante ang eksklusibo nga pagpasuso sa una nga anum ka bulan sang kabuhi sang lapsag bangud nagahatag ini sang kompleto nga nutrisyon kag antibodies nga nagabulig sa pagproteher batok sa nagkalainlain nga mga balatian.
Suno kay Yeoh, nagabenepisyo man ang iloy paagi sa mas madasig nga pagbalik sang kusog pagkatapos sang pagpanganak kag pagpanubo sang risgo sa pila ka klase sang kanser.
Pahayag pa niya, dapat nga may yara man sang early initiation of breastfeeding, skin-to-skin contact, feeding on demand kag sakto nga latch agud masiguro nga nagasuso sang maayo ang lapsag.
Nagpanawagan man ang natungdan sa pamilya, komunidad, health workers kag mga employer nga padayon nga suportahan ang mga iloy nga nagapasuso agud mas madamo nga mga lapsag ang makabenepisyo sa gatas sang iloy.
