Ginahulat na lamang ang medical record kag death certificate sang mga biktima para mapasaka na ang kaso nga frustrated murder kag murder batuk sa suspek nga naglabo sa iya live-in partner kag menor de edad nga manak sa Barangay Mianay, Sigma, Capiz.
Ini ang ginpahayag ni Police Lt. Rey Jason Gimeno, hepe sang Sigma Municipal Police Station sang mapakig-angutan sang Bombo Radyo Roxas.
Suno kay Gimeno nga padayon ang manhunt operation sang kapulisan kay Gerald Dela Cruz nga nagpalagyo matapos malab-an ang live-in partner nga si Adalia Alvarez kag 16-anyos nga manak.
Gindugang pa sang opisyal nga ila man napadulungan ang Sitio Alimpangon, Barangay Malapad Cogon, Sigma, ang balay nga gindak-an sang suspek, apang wala nila ini maabtan sa baylo ang duha lamang ka mga utod ni Dela Cruz ang ila nakita kag naestorya.
Ginpangabay sini sa mga utod sang suspek nga kumbinsihon ang ila utod nga magsungka kag atubangon ang iya nahimo nga kasal-an agud pamatud-an ang ginbuy-an nga tinaga antes nagpalagyo matapos ang krimen nga nagpangayo sang pasaylo sa iya nahimo sa duha.
Indi man mapat-ud sa karon ang ensakto nga natabo kag ginahulat nga mag-ayo si Alvarez nga yara karon sa ospital bangud siya lamang ang yabi para mahibaluan kun ano ang gintunaan sang ila pagbaisay ni Dela Cruz nga naglab-ot sa paglabo sa ila.
Apang nahibaluan nga antes ang krimen, magkaupod pa ang maglive-in partner nga nagtambong sa isa okasyon kag pagkagab-I natabo ang krimen.
Samtang ang siyam ka bulan nga anak sang manak sang biktima ang yara karon sa kostodiya sang iya pakaisa nga si Mrs. Sta. Ana bangud nakahambal pa si Alvarez nga sa iya ibilin ang nasambit nga lapsag.
Samtang nagpanawagan si Gimeno sa suspek nga magsungka na agud mapamatud-an sini nga iya ginhinulsulan ang ginhimo nga kasal-anan.
Ginrantiya man sang opisyal sa suspek ang iya nga seguridad kun yara na ini sa sulod sang karsel sang Sigma PNP.
