Nagpahanumdom ang isa ka medical specialist sa importansya sa paghalong sang ikaayong lawas subong nga National Lung Month.
Sa interview sang Bombo Radyo kay Dr. Mark Christian Agase, Medical Specialist II sang Sen. Gerardo M. Roxas Memorial District Hospital, iya ginpahayag nga dapat hatagan sang nagakaigo nga atensyon ang mga baga kag indi pagbalewalaon ang mga sintomas sang pulmonary diseases.
Suno kay Dr. Agase, kabahin sa mga dapat bantayan amo ang ginatawag nga “Big 5 Pulmonary Diseases” nga nagalakip sa Tuberculosis o TB, Pneumonia, Chronic Obstructive Pulmonary Disease (COPD), Asthma, kag Lung Cancer.
Lakip sa mga warning signs nga dapat bantayan amo ang padayon ukon malawig nga pag-ubo, nabudlayan sa pagginhawa, kasakit ukon pagbug-at sang dughan, wheezing, balik-balik nga hilanat, pagluya sang lawas kag pabag-o bag-o sang timbang.
Pahayag pa niya, dapat likawan ang pagpanigarilyo, exposure sa secondhand smoke, polusyon sa hangin, occupational exposure sa abog ukon kemikal, impeksyon, kag family history para sa pila ka kondisyon.
Nagpanawagan man ang natungdan nga importante ang early detection and treatment, bangud mas daku ang tsansa nga makontrol ukon mabulong ang isa ka pulmonary disease kon ma-detect ini sa mas temprano nga tion.
