ROXAS CITY – Pilas sa likod ang naangkon sang isa ka mekaniko matapos nga ginbuno sa Barangay San Jose Roxas City.
Ginkilala ang biktima nga si alyas Berto 30-anyos kag residente sang Brgy. Pob. Sur, banwa sang Sigma, samtang ang ginapahayag nga suspek amo si alyas Edilberto nga residente naman sang Brgy. San Jose, Roxas City.
Base sa impormasyon nga nagikan sa Roxas City Police Station, ginpahayag nga samtang ginakay-o sang biktima ang motorsiklo mismo sang suspek, hinali nalang nga may nagluntad nga mainit nga pagbinaisay sa tunga sang duwa ka persona.
Sang malakat na kuntani ang biktima, gulpi nalang ginbuno sang suspetsado ang biktima gamit ang isa ka patalom.
Bangud sini, nag-angkon sang pilas sa likod kag madasig naman nga nagpalagyo sa lugar ang suspek matapos makumiter ang krimen.
Gilayon naman nga gindala sa Roxas Memorial Provincial Hospital ang biktima para sa nagakaigo nga pagbulong.
Samtang, narekober naman sa ginluntaran sang insidente ang 12 pulgada nga patalom nga gingamit sa pagpangbuno.
Sa karon, padayon nga nagapatigayon sang hot pursuit operation ang mga kapulisan batuk sa nasambit nga suspek.
