ROXAS CITY – Pilason ang isa ka mekaniko, matapos nga ginbuno sa Bilbao Street, Barangay Inzo, Roxas City kahapon Hunyo 24.
Ginkilala ang biktima kay Glenn Guanzon 42-anyos kag residente sang Barangay Adlawan, sining syudad, samtang ang suspek ang ginkilala kay Janjan Villaruz alyas “Janjan Ugat” yara sa legal nga pang-edaron kag residente sang Sitio Mason, Barangay Banica, Roxas City.
Sa impormasyon nga nakuha sang Bombo Radyo sa Roxas City PNP, nga magasukot kun tani si Guanzon kay Villaruz sang iya utang sang may nagpatunga nga indi pag-intidhanay sa ila nga duha kag hinali na lamang nga ginbuno sang suspek an gang biktima.
Bangud sini, nag-angkon sang pilas sa duha ka abaga si Guanzon nga madasig naman nga ginrespondihan sang katapo sang Roxas City Emergency Response Team (RCERT) agud dapatan sang nagakaigo nga pagbulong antes ginpadangat sa Roxas Memorial Provincial Hospital (RMPH).
Samtang ang suspek, madasig nga nakapalagyo padulong sa wala mahibaluan nga direksyon.
Sa karun padayon pa ang ginapatigayon nga hot pursuit operation sang mga otoridad agud matigayon nga madakpan ang nasambit nga suspetsado.
