ROXAS CITY – Nag-angkon sang lagob sa magkatuhay nga parte sang kalawasan ang isa ka menor de edad matapos ginpulihan sang kastigo sang pila ka mga persona sa Brgy. Pob. Tabuc banwa sang Pontevedra sadtong tinalikdan nga adlaw sang Sabado.
Sa pagpakig-angot sang Bombo Radyo Roxas kay Berlito Borce Jr. amay sang 15-anyos nga biktima, ginpahayag sini nga gintundaan na lamang sila sang pila ka residente nga ginkastigo na ang iya bata sang wala makilala nga mga suspetsado.
Dugang pa sini, ginpabalhag na nila ang nasambit nga hitabo sa Pontevedra Municipal Police Station kag ginpanugyanan sila sang mga kapulisan nga ipa-medical ang biktima agud mapasakaan sang kaso ang mga persona nga nagpangkastigo.
Nahibaluan nga nagpadulong sa nasambit nga banwa ang biktima kaupod ang isa sini ka abyan, kun sa diin na-tripingan ang mga ini sang 5 tubtob 7 ka mga kalalakinhan.
Suno sa amay sang biktima nga masami nagatambay ang mga kalalakinhan sa esplanade kag kun may yara sila sang makursunadahan ila ini ginabalda kag ginakuhaan sang video ang ila pagpanakit.
Desidido naman ang pamilya sang biktima nga magpasaka sang kaso sa mga suspetsado kun ini ang madapkan sang mga kapulisan.
Sa karun, padayon ang imbestigasyon sang kapulisan agud matumod ang mga suspetsado.
