ROXAS CITY – Nagreklamo ang isa ka 14-anyos nga babaye matapos nga ginaalegar masami ginahikap sang iya nga step father ang pila ka mga pribado nga parte sang iya nga lawas sa Barangay Baybay, Roxas City.
Sa exclusive interview sang Bombo Radyo kay Punong Barangay Reynaldo Magallanes ginpahayag sini nga nagpadulong sa ila barangay hall ang biktima kag ginsugid sa iya ang ginahimo nga pagmolestiya sang iya step father nga si alyas Joey.
Bangud diri, gilayon nga ginrespondehan sang mga opisyales sang barangay kaupod ang katapo sang mga otoridad kag ginpadulongan ang puloy-an kun sa diin nagaistar ang bata kag iya step father.
Ginpahayag ni Magallanes nga nagtuyo pa kuntani nga magpalagyo si alyas Joey apang nadakpan man ini gilayon sang mga katapo sang militar.
Suno kay Magallanes nga indi na matakuran sang biktima ang ginahimo sang iya step father sa tagsa ka mahubog ini rason nga nagpangayo na ini sang bulig sa ila barangay.
Magluwas pa diri, sang naga-edad pa lamang ini sang siyam katuig ginahikap kag ginasakit na ini ni Joey.
Apang, hugot naman nga ginpanginwala sang suspek ang alegasyon sang iya nga manak.
Suno kay Joey nga posible nasaplidan lamang sang iya kamot ang dughan sang bata bangud lutoy man ini sa trabaho kag hubog kag isa lamang sila tanan ka hulot nga ginatulogan kaupod ang live-in partner nga iloy man sang biktima.
Ginpahayag pa sini nga indi sini hungod ang paghikap sa dughan sang amo nga biktima.
Hugot man sini nga ginpanginwala nga ginasakit niya ang iya manak.
Dugang pa sini nga nagtuyo lamang ini magdalagan sang nakita ang mga otoridad bangud man sa iya kakulba apang suno sa iya wala man siya plano nga magpalagyo.
Temporaryo man ini nga ginkustodiya sang mga kapulisan ang suspek samtang ang biktima yara sa Women and Children Protection Desk ukon WCPD section sang Roxas City PNP agud magpaidalom sa counseling.
Sa bahin naman sang iloy sang biktima ginapahayag nga wala man sila sang plano nga pasakaan ang suspek bangud wala man ini sang trabaho kag amo lamang ini ang nagabuhi sa ila nga pamilya.
Mahibaluan nga nagatrabaho sa isa ka ulubrahan sang hollow blocks ang suspek sa Arnaldo Boulevard, Roxas City.
Samtang sa tion nga mapamatud-an nga matuod ang alegasyon sang amo nga bata mahimo nga mapasakaan sa gihapon sang nagakaigo nga panumbungon ang suspek.
