Menor de edad nga nagapaligo sa suba patay matapos nga nalumos sa banwa sang Dumarao, Capiz

ROXAS CITY – Patay ang isa ka menor de edad matapos nga ginaalegar nalumos sa Barangay Astorga, Dumarao, Capiz.

Base sa inisyal nga imbestigasyon sang Dumarao PNP nga nagapaligo ang wala na ginhingadlan nga biktima kaupod ang iya tiyo nga si Renjon Gaversa sa Astorga River sang kapin sa duha ka oras.

Apang, nanotisyaran na lamang sang tiyo sang biktima nga wala na ini nakabutwa sa idalom tubig.

Bangud diri, gintsekyar sini sa idalom sang tubig ang nasambit nga biktima kag natukiban na lamang sini nga nagahigda na ini sa idalom sang tubig kag wala na sang kabuhi.

Gilayon naman ini nga nagpanawag sang bulig rason nga gintinguhaan pa sini nga madala sa ospital ang biktima apang gindeklarar naman ini nga dead on arrival sang attending physician.