ROXAS CITY – Wala makasalbar sa kamatayon ang menor de edad nga babaye, matapos nga ginbuno sa Brgy. Camburanan, Tapaz, Capiz.
Ginkilala ang biktima kay alyas Amping, 17-anyos kag residente sang Barangay San Vicente, Jamindan, Capiz, samtang ang ginatudlo suspek ang ginkilala kay alyas Nonoy 40-anyos, kag residente sang Barangay Agcococ, Tapaz, Capiz.
Sa impormasyon nga nakuha sang Bombo Radyo sa lugar, ginapahayag nga samtang nagatindog ang biktima sa higad sang dalan nagpondo ang suspek sakay sang motorsiklo sini kag hinali na lamang nga ginbuno ang biktima.
Bangud sini, nag-angkon sang pilas sa dughan ang biktima nga gilayon naman ginrespondihan sang katapo sang Bureau of Fire Protection Tapaz agud dapatan sang pauna nga pagbulong antes ginpadangat sa Tapaz District Hospital para kuntani sa nagakaigo nga pagbulong apang gindeklarar ini nga dead on arrival sang doctor.
Sa karun padayon nga nagapatigayon sang hot pursuit operation ang katapo sang Tapaz MPS batuk sa suspek kag ginahibalo kun anu ang motibo sa nasambit nga insidente.
