Patay ang isa ka menor de edad matapos nga malapakan ang Ceres Bus sa National Highway sa Sitio Sta. Ana Reles, Brgy. Mabini, Escalante City, ala 1:30 sang hapon, Hulyo 22, 2026.
Ang biktima isa ka menor de edad kag residente sang Sitio Sta. Ana, Brgy. Mabini syudad sang Escalante, Negros Occidental.
Sa inisyal nga imbestigasyon, nagsakay ang menor de edad upod ang iya mga ginikanan sa nasambit nga bus gikan sa Sitio Sta. Ana padulong sa Escalante Public Terminal.
Sang nakalab-ot sila sa ila kaladtuan, nanaug ang mga ini.
Ginhakwat sang konduktor ang bata kag ginbutang sa higad sang karsada samtang gindala naman sang iya mga ginikanan ang ila mga gamit.
Apang wala matalupangdan sang kundoktor nga ang bata ang naglakat padulong sa atubangan sang bus samtang ang driver ang nagmaneho agud magbiya sa lugar.
Bangud sini, aksidente nga nalapakan ang bata kag nag-angkon sang patal nga pilas sa ulo.
Gilayon man nga nagresponde ang mga personnel sang City Disaster Risk Reduction and Management Office (CDRRMO) kag gindala ang biktima sa Vicente Gustilo District Hospital apang gindeklarar nga Dead on Arrival (DOA).
Sa subong ang bus kag ang driver ang yara na sa kustodiya sang Escalante City Police Station para sa nagakaigo nga disposisyon.
