Patay ang isa ka menor de edad samtang pito pa ka pasahero ang nasamaran matapos bumunggo ang tricycle sa isa ka naka-park nga tanker truck sa Barangay Culasi, Roxas City.
Ang tricycle ginamaneho ni alyas “Labo,” 56 years old, residente sang nasambit man nga barangay, kag may walo ka pasahero nga sakay, lakip ang apat ka menor de edad.
Sa interview sang Bombo Radyo kay PLTCOL Rogelio Tomagtang Jr., Chief of Police sang Roxas Component City Police Station, iya ginpahayag nga nagabiyahe ang tricycle halin Barangay Culasi pakadto sa Barangay Baybay sang nadulaan ini sang kontrol malapit sa isa ka gasolinahan kag bumunggo sa tanker truck nga naka-park.
Gindala sang RCERT ang tanan nga biktima sa paghatag sang first aid, apang isa ka menor de edad ang napatay samtang ginabulong bangod sa malala nga mga pilas nga iya naangkon.
Suno kay Tomagtang, wala pa matumod sang kapulisan ang identidad sang mga pasahero, samtang 38 anyos ang driver sang fuel tanker truck.
Sa karon, yara sa kustodiya sang Roxas Component City Police Station ang driver sang tricycle para sa nagakaigo nga disposition kag posible nga pag-inquest sa Lunes.
Padayon pa ang imbestigasyon sang kapulisan, lakip ang pagdetermine kon yara sa impluwensya sang makahulubog nga ilimnon ang driver sang tricycle sang natabo ang aksidente.
Ginpahanumdom naman sang kapulisan nga ang mga motorista nga magdisiplina sa pagmaneho, magsunod sa traffic rules kag ordinansa, kag magpatuman sang defensive driving agud malikawan ang mga aksidente sa dalan.
