May duha pa ka torneo nga pagapasakupan ang Philippine men’s national football team (PMNT) bilang kabahin sang ila nga preparasyon sa 2024 AFF Mitsubishi Electric Cup.
Una nga pasakupan sang hubon amu ang Merdeka Cup nga magasugod sa Setyembre 2 tubtob 10 sa Kuala Lumpur, Malaysia.
Matapos sini amu ang King’s Cup nga magasugod sa Oktubre 7 tubtob 15 sa Thailand.
Sa nasambit nga torneo, makaatubang sang Pilipinas ang mga may matag-as nga ranking.
Yara sa ranked 147 ang Pilipinas nga makaatubang ang ranked 102 nga Tajikistan, ranked 117 nga Lebanon kag ranked 135 nga host country sa Merdeka Cup nga Malaysia.
Samtang sa King’s Cup naman, makasambuwa nila ang ranked 93 nga Syria, ranked 100 nga Thailand kag ang Tajikistan.
Antes ang FIFA International window nga magasugod halin Nobyembre 11-19 nga ang isa ang pagahiwaton sa pungsod, may patigayunon nga duha ka friendly match ang Pilipinas.
Ginpahayag ni Philippine Football Federation director of national teams Freddy Gonzalez nga plantsado na ang schedule sang men’s football team sang pungsod antes ang international tournament.
Makaatubang man sang Pilipinas ang Myanmar sa Nobyembre 27 kag Vietnam sa Disyembre 3 nga pagahiwaton sa Rizal Memorial Stadium para sa Southeast Asia’s premier football tournament nga AFF Mitsubishi Electric Cup. Matapos sini, makasambuwa nila ang Indonesia sa Disyembre 7 nga patigayunon naman sa Jakarta.
