Matigdas nga ginpahayag ni Senator Risa Hontiveros nga indi mahimo nga gamiton nga rason ni suspended Bamban, Tarlac Mayor Alice Guo ang iya nga mental health para palagyuhan ang mga salabton sini sa layi.
Ini ang may kaangtanan sa pahayag sang abogado ni Guo nga indi makatambong sa hearing sang Senado buwas nga adlaw si Mayor Alice bangud sa mataas nga stress level sini.
Suno kay Hontiveros, mismo nga si Guo ang nagkutkot sang iya kaugalingon nga lulubngan bangud wala sini masabat ang mga mahupos nga pamangkot nga kaya sabton sang sin-o man nga ordinary nga tawo kag nagapa-victim na ini subong.
Paandam sang senadora, kun indi pagkilalahon ni Guo ang subpoena, kinamatarong sang Senado nga mag-isyu sang arrest order batuk sa alkalde.
Punto ni Hontiveros, indi lamang si Guo ang traumatized kundi ilabi na ang mga nangin biktima sang human-trafficking, mga dumuluong kag mga Pilipino nga pilit nga ginapatrabaho sa mga POGO scam hubs.
Dugang pa sang mamalidha, mangin ang mga Pinoy ang traumatized naman bangud may isa ka Chinese national nga nangin Mayor sang Pilipinas.
