PRESIDENT ROXAS, CAPIZ – Nagpatigayon sang disinfection sa merkado publiko sang banwa sang President Roxas, Capiz matapos nakumpirma nga 50 ka empleyado sang isa ka grocery store ang nakaangkon sang close contact sa tatlo ka empleyado nga nagpositibo sa Covid-19.
Ginpahayag ni Mayor Receliste ‘’Tanoy’’ Escolin nga isa ini sa nangin tikang sang lokal nga gobyerno sang President Roxas agud ma-disinfect ang palibot sang merkado.
Ginsaraduhan man ang gate 1 sang merkado sa diin nahamtang ang grocery store agud indi maagyan sang mga vendors kag mga bumalakal nga nagapanindahan.
Ginapalibot man sang alkalde ang contact tracing team agud magpangusisa kun sin-o kag diin nagkadto ang mga naka-close contact sang tatlo ka nagpositibo kag iban nila nga empleyado nga nangin symptomatic agud matsekyar kun may nabatyagan sila nga mga sintomas sang COVID-19.
Nagpanagtag man sang mga vitamins ang LGU sa 19 ka mga symptomatic nga na-close contact sang nagpositibo sa amo nga balatian nga yara karon sa Municipal Quarantine Facility.
Ginpalab-ot man sang alkalde sa iban nga nakabakal ukon nakapalapit sa amo nga grocery store, pananglitan may mabatyagan sila nga sintomas gilayon nga impormahon ang rural health unit agud magiyahan sang dapat himoon.
Nagpangabay man ini sa mga pumuluyo nga indi magpadulong sa merkado kun indi lamang importante ang baklon, agud malikawan ang paglapta sang coronavirus disease.
Santu sa pagpangusisa sang lokal nga gobyerno nga may yara sang travel history ang driver sang grocery store nga nagpositibo sa CPVID-19, sa diin sa probinsiya sang Iloilo sila nagapamalaklon.
Posible man nga ang driver amo ang carrier sang virus kag natapnan lamang sini ang mag-asawa nga employer nga nagpositibo man sa COVID-19.
Nagpasalig naman si Escolin nga handa magbulig ang gobyerno sang President Roxas sa mga kinahanglanon nga pagkaon kag vitamins sang 19 ka indibidwal nga symptomatic nga yara sa facilidad.
Natalana man sila nga ipaidalum sa swab test agud matul-id kun positibo man sila sa COVID-19.
Samtang ginapangamuyo ni Escolin nga magnegatibo lamang ang resulta sang swab test bangud sa tion nga 3 ka barangay ang makaangkon sang positive case, santu sa guidelines kag pagsulundan sang Inter-Agency Task Force, otomatiko nga i-lockdown ang lugar.
Kun matabo wala sang mahimo ang LGU kundi sundon ang pagsulundan agud maproteksyunan ang mga pumuluyo gikan sa paglapta sang COVID-19. Aminado si Escolin nga mabudlayan pananglitan nga i-lockdown ang banwa bangud daku nga pondo ang ila kinahanglanon agud masuportahan ang pagkaon kag ayuda nga ihatag sa mga pumuluyo nga indi makaguha sa ila balay para makatrabaho
