ROXAS CITY – Hugot nga ginamonitor sang Civil Service Commission (CSC) sa probinsya sang Capiz ang tanan nga ahensiya sang gobyerno angut sa pila ka mga pagsulundan sa pagsugod sang election period.
Ginpahayag ni CSC provincial director Rufino Leoneras nga ba-se sa ginpaguwa nga resolution 10429 sang Commission on Elections nga humalin sang Marso 29 tobtob sa Mayo 12 ginadumilian ang paghire, promote ukon pagpasaka sa sweldo sang mga empleyado sang gobyerno sa pagsugod na sang election period.
Magluwas diri, ginadumilian man ang pagtransfer sa bisan ano nga departamento ukon lugar sa mga empleyado sang gobyerno humalin sang Enero 13 tubtob Hunyo 12.
Apang mangin exempted lamang ang mga ini kun gingrant sang law department sang Comelec ang ila nga request.
Ginpahanumdum pa ni Leoneras ang mga empleyado sang gobyerno nga bawal sila nga magpasakup sa pagpangampanya sang bisan sin-o nga kandidato.
Sa karon, wala pa sang may nabaton nga reklamo ang CSC may kaangtanan sa nagalapas sa pagsulundan sang Comelec.
Samtang, may nagakaigo nga penalidad ang mapamatud-an naglapas sa nasambit nga pagsulundan.
