Posible nga ma-cite in contempt ang mga bangko, mga ahensya sang gobyerno lakip na ang Bureau of Internal Revenue (BIR), kag mga pribado nga korporasyon nga padal-an sang subpoena sang Senate Impeachment Court kon mapaslawan ini nga magtambong ukon magsumite sang mga dokumento nga ginapangayo sa impeachment trial ni Vice President Sara Duterte.
Sa interview sang Bombo Radyo kay Atty. Elaine Tantengco Bathan, Assistant Dean sang University of San Jose-Recoletos School of Law, iya ginpahayag nga may awtoridad ang impeachment court sa pagpatuman sang mga subpoena nga iya ginapaguwa agud masiguro ang husto ang pagpadayon sang trial.
Suno kay Bathan, kon ang isa ka indibidwal, ahensya sang gobyerno, bangko ukon pribado nga korporasyon nga ginpadal-an sang subpoena wala sang nagakaigo nga legal nga rason sa indi pagtambong ukon indi pagsumite sang mga dokumento nga ginapangayo sang korte, mahimo ini nga ma-cite in contempt.
Pahayag pa niya, mahimo nga ma contempt ang bisan sin-o nga may tinutuyo nga nagtuman sa isa ka legal nga mando sang impeachment court, ilabi na kon ang ginapangayo nga testimonya ukon mga rekord ginakabig nga importante sa kaso.
