ROXAS CITY – Nagsugod na subong nga adlaw, Marso 1 ang mga nakalinyada nga mga aktibidades nga ginpreparar sang Bureau of Fire Protection (BFP) – Capiz para Fire Prevention Month may tema “Sa Pag-iwas sa Sunog di ka Nag-iisa”.
Nagsugod ini, pinaagi sa pagpatigayon sang kick-off activity, holy mass, simultaneous blowing of siren kag motorcade parade kaupod ang mga partner agencies kasubong sang Philippine National Police, Philippine Coast Guard, Department of Education, Bureau of Jail Management and Penology, Fire Volunteers Group kag madamo pa.
Ginpatigayon man sa isa ka daku nga mall sa Barangay Lawaan, sini nga syudad ang ‘Tuklas Talento sa pag-awit at sayaw’ nga ginpasakupan sang mga bombero nagikan sa mga nagkalain-lain nga municipal fire stations.
Sa nangin kabahin sang mensahe ni FSupt. Jenny Mae Masip, Provincial Fire Marshal, madamo pa sang mga aktibidad ang balantayan kalakip na diri ang labing una nga color fun run kag Dental Mission ‘Bumbero Free Pabunot’.
Samtang, ginpatpat naman ni Fire Chief Inspector Sidgie Gerardo, City Fire Marshal sang Roxas City Fire Station ang mga tips agud malikawan ang sunog sa balay, gina-trabahuan ukon bisan diin nga lugar.
Suno diri, importante nga may bastante nga ihibalo ang kada isa kun paano malikawan ang sunog, bangud apisar baga ukon gamay lang ini nga kalayo posible ini makahalit kag makatuga sang kamatayon kun pabay-an.
Mahibaluan, sa idalum sang Presidential Proclamation No. 115-A, ang bulan sang Marso ang gindeklara nga Fire Prevention Month bangud man sa alarming nga pagtaas sang fire incidents sa bilog nga pungsod.
