ROXAS CITY – Nagalaom ang pamunuan sang Presidential Communications Operations Office nga makapaguwa na sang desisyon ang korte sang kaso sa Ampatuan-Maguindanao Massacre.
Sa nangin interview sang Bombo Radyo Roxas kay (PCOO) Undersecretary Joel Egco, ginpahayag sini nga natapos na ang trial sang kaso sadtong Agosto 22 sini nga tuig kag ginahulat na lamang ang 90 ka-adlaw para mahatagan sang hustisya ang mga biktima sa Ampatuan-Maguindanao Massacre.
Matandaan nga naglab-ot sa 58 ka mga indibidwal ang napatay kun sa diin 32 diri ang mga katapo sang media kag kalakip na si Bombo Bart Maravilla ang Bombo Reporter sang Bombo Radyo Koronadal.
Nagalaom man si Usec Egco nga mapadasig na ang paghulag sang kaso batuk sa mga akusado sa Ampatuan Massacre nga naglab-ot na sa napulo katuig nga wala sa gihapon nakuha ang hustisya para sa mga biktima nga kadam-an diri mga mamamahayag.
Nagasalig man si Egco sa ginpromesa ni Presidente Rodrigo Duterte nga mahatagan na sang hustisya ang mga napatay nga biktima sa idalom sang iya administrasyon.
Samtang, sa Nobyembre 23, patigayunon ang ika-10 nga anibersaryo sang madugoon nga Maguindanao Massacre kun sa diin madamo sang kabuhi ang nadula.
