ROXAS CITY – Nagpatigayon sang isa ka sinapol ang pila ka mga alkalde sa premier-distrito sang probinsiya sang Capiz agud hinalaan ang ginpalab-ot nga reklamo sang pila ka mga fish vendors nga indi makalusot sa Northern Iloilo agud magpalaklon sang ila ginabaligya nga suplay sang pagkaon.
Ini ang ginpahayag ni President Roxas Mayor Receliste ‘Tanoy’ Escolin sang mainterview sang Bombo Radyo.
Suno kay Escolin, kalakip man sa nagtambong sa amo nga sinapol ang mga alkalde sang banwa sang Pilar, Maayon, Pontevedra kag Panitan.
Kasunod ini sang reklamo sang mga manugbaligya nga wala pagpahanugot sa ila nga makalusot sa Estancia kag Balasan, Iloilo apisar nga ginapahayag may exemptions sa border control kag kalakip diri ang mga nagadala sang food supply.
Ginpahayag ni Escolin nga may mga gin-isyu man sila nga mayor’s permit sa amo nga mga negosyante apang wala sa gihapon sila ginpahanugutan.
Suno kay Escolin nga may kapin napulo ka mga fish vendors ang nagdangop sa iya kag nagpalab-ot sang amo nga problema.
Bangud diri suno sa iya, nagpakig-angut sila sa alkalde sang Estancia kag Balasan agud mapalab-ot ang amo nga problema.
Ang nasambit nga mga manugbaligya suno sa alkalde ang nagakuha sang suplay sang ila isda sa Northern Iloilo agud mabaligya sa ila tagsa ka mga banwa.
Nagalaom man si Escolin nga mangin positibo ang resulta sang ila negosasyon sa mga alkalde sang Estancia kag Balasan agud mahatagan man sang konsiderasyon ang mga manugbaligya sa ila nga palangabuhian.
