ROXAS CITY – Ginpakigbahin ni Bombo International Correspondent Greg Aguilar nga kaangay sa Pilipinas, batyag man sang mga Amerikano ang kalbaryo sa pagtinaas sa presyohanay sang gatong sa ila pungsod.
Sa interview sang Bombo Radyo kay Aguilar, ginpahayag sini nga sang Biyernes nagdangat na sa $105 per barrel ang presyo sang petroleum sa world market, bangud sini nagtaas man ang presyo sang gasolina sa Estados Unidos.
Ginhalimbawa sini ang presyo sang pinakabarato nga gasolina sa US nga regular unleaded, kun sa diin nagabalor ini sa $4 per gallon, samtang sa California $6 per galloon.
Sa sini nga kahimtangan, indi madula sa mga americans nga basulon ang mga elected officials, ilabi na si US President Joe Biden.
May yara man sa ila sang fuel subsidy kaangay diri sa pungsod kag wala man sila nagaproblema sa pagkaon apang may pila gid lamang ka pagmahal sa mga commodities.
Ginapahayag nga tuga ini sang nagapadayon nga giyera sang Russia kag Ukraine.
Nagapati naman si Aguilar nga magasolbar man ini sa labing madali nga panahon.
Natalana man nga makipagpulong si Biden sa iban pa nga lider sang NATO countries.
