CAPIZ – Tatlo ka mga anay rebelde nga New Peoples Army (NPA) kag anum ka miyembro sang militia ng bayan sa probinsya sang Capiz ang nagbaton sang bulig-pinansiyal pinaagi sa Enhanced Comprehensive Local Integration Program (E-CLIP) sang gobyerno.
Ini ang ginpahayag ni Lt. Col. Joel Benedict, ang commanding officer sang 61st Infantry Battalion sang Philippine Army sang mainterview sang Bombo Radyo.
Suno kay Batara, sa nasambit nga numero, anum sa mga ini ang makabig nga Militia ng Bayan (MB) samtang tatlo naman ang regular nga miyembro sang rebelde nga grupo.
Mahibaluan nga nagbaton sang P50, 000 nga livelihood assistance ang regular nga miyembro sang rebelde nga grupo samtang tag-P15, 000 naman ang mga Militia ng Bayan.
Samtang, ginhatagan naman sang dugang P1,000 nga transport assistance ang nasambit nga mga benepisyaryo.
Magluwas diri, ginhatagan man sila sang seeds gikan sa Department of Agriculture (DA) kag paskwa nga hampangan para sa ila mga kabataan.
Mahibaluan nga nagsungka ang nasambit nga mga indibidwal pinaagi man sa community support program sang militar rason nga naganyat ang mga ini nga magbalik na sa sabak sang gobyerno.
Magluwas sa bulig-pinansiyal, madamo pa sang oportunidad para sa ila nga kabahin sang mga programa sang gobyerno sa pagpapas sa insurhensiya pinaagi sa ginatanyag nga mga trainings kag livelihood programs.
Padayon naman ang kampanya sang hanay sang militar sa pagkumbinse sa mga miyembro sang rebelde nga grupo nga talikdan na sang mga ini ang ila hublag kag magbalik sa sabay sang gobyerno.
