SIGMA, CAPIZ- Padayon nga nagadamo ang numero sang mga apektado nga pamilya kag indibidwal sang Bagyo Tino sa banwa sang Sigma, Capiz.
Sa interview sang Bombo Radyo kay Mayor Dante Rizal Eslabon sang amo nga banwa, iya ginpahayag nga sandig sa datos nga ila natipon as of 12 noon sang Nobyembre 5, yara na sa 10, 124 ka mga pamilya ukon kabaylo sa 29, 936 ka mga indibidwal ang apektado sang nasambit nga bagyo.
Suno kay Eslabon, may una na nga ginpanghatag nga mga food packs para sa mga naapektuhan apang sa gihapon kulang pagid para sa mga pumuluyo nga iya nasakupan.
Pahayag nya, nagpangayo sila sang bulig sa Office of the Civil Defense kag sa gobyerno probinsyal para sa dugang nga mga food packs bangud amo ina sa ubong ang ila nga problema.
Samtang, apisar nga wala na sang bagyo, ginabantayan nila sa subong ang baha, bangud amat-amat na nga naga-ilig ang tubig halin sa mga matag-as nga bahin deretso sa ila nga banwa.
May yara na sang lima ka mga barangay sa 21 tanan ang indi na passable sa tanan nga mga sahi sang salakyan. Ginakalakipan ini sang mga Barangay sang Bangon-bangon, Mangoso, Cogon, Dayhagon kag Acbo.
Apang, nagapabilin naman nga passable sa tanan nga sahi sang salakyan ang tanan nga mga highways sang banwa.
Sa gihapon naka-standby ang mga responders para sa gilayon nga paghatag sang bulig sa nagakinahanglan. Nagpanagtag naman sang bulong ang Rural Health Unit sa tagsa ka mga pumuluyo.
Sa subong, ginahulat nalang sang ila nga talatapan ang food packs nga ila ginpangayo agud nga mapanagtag man sa dason sa mga pumuluyo.
Nagpasalamat naman ang alkalde sa kooperasyon sang mga pumuluyo kag sa bulig tanan sang mga frontliners.
Interviewed by Bombo Francis Biñas
