ROXAS CITY – Nakabaton na sang P5,000 nga cash assistance gikan sa city government ang mga apektado nga pamilya sang nagluntad nga sunog sa Sitio Plaridel, Barangay Cagay, syudad sang Roxas.
Ini ang ginkumpirmar ni Punong Barangay Arturo Aragon sang mainterview sang Bombo Radyo.
Suno sa punong barangay, magluwas sa bulig pinansyal kag food packs sang gobyerno may yara man sang relief goods nga ginpalab-ot ang mga pribado nga sektor.
Matandaan nga ginlamon sang kalayo ang napulo tanan ka mga balay, kun sa din 7 ang totally burned kag 3 naman ang partially burned.
Ginapatihan nga ang ginhalinan sang sunog ang ginaalegar pagsindi sang posporo sang isa ka bata.
Apang, sa imbestigasyon sang BFP-Roxas, nagaguha nga faulty electrical wiring ang gintunaan sang sunog.
Ginpahayag ni Aragon nga may kadugayon na ang mga pamalay kag human pa ini sa light materials rason nga madasig naglapta ang kalayo.
Mahibaluan nga may pila ka mga kagamitan nga nasalbar sa amu nga sunog.
Samtang, nagdesisyon naman ang apektado nga mga pamilya nga temporaryo nga magpuyo sa ila mga himata sa amu man nga barangay apisar nagtanyag ang council sang evacuation centers.
