Natukiban sang mga otoridad ang nagkalain-lain nga armas-luthang kag bala sa puloy-an sang dismissed nga miyembro sang pulis, matapos nga gin-implementar ang search warrant sang gintingub nga puwersa sang CIDG-Capiz, Dumalag MPS, 602nd COY RMFB 6, 1st PMFC Capiz Maneuver Platoon kag MARPSTA, sa Brgy. Duran, banwa sang Dumalag, kaina sang aga, Setyembre 28.
Sa pagpangusisa sang Bombo Radyo sa lugar, nahibaluan nga wala sa amu nga puloy-an ang subject sa nasambit nga operasyon nga si Meldin Frio Frias, residente sang amu nga lugar.
Natigayon nga makuha sa puloy-an sang napahalin sa serbisyo nga katapo sang pulis ang mga masunod:
-1 unit sang caliber 9m KG9 may duha ka magazines kag mga bala
-2 ka unit sang silencer sa wala mahibaluan nga caliber pistol
-1 ka unit sang caliber .45 pistol ARMSCOR, may magazine kag mga bala
-1 ka unit sang Glock caliber .40 nga may tatlo ka magazines, 28 ka mga bala kag shooting sports bag
-2 ka bilog sang magazine para sa M16 rifle
-19 kabilog nga bala sang 5.56
-26 ka bala sang 12 gauge shotgun
-28 ka mga bala sang caliber 9mm luger kag may 8 ka mga baseyo
-1 ka magazine sang .45 caliber pistol, 6 ka mga baseyo kag 6 ka mga bala sang nasambit nga armas
-2 ka mga kaha para sa bala
-1 ka plastic/roni kit
-1 ka unit sang homemade 12 gauge shotgun nga may 7 ka bala kag
-1 kabilog sang bulletproof vest At-large naman si Frias, matapos nga wala ini makit-an sa ila puloy-an sang gin-implementar ang search warrant nga ginpapanaug ni Hon. Judith Orendain-Tonogbanua sang RTC-6, Br. 20, Mambusao, Capiz.
Nangin witness ang Punong Barangay kag Brgy. Kgwd. sang nasambit nga barangay kag katapo sang media sa nasambit nga implementasyon.
Sa karon, ginpadangat ang mga nakumpiskar nga ebidensiya sa Dumalag MPS, para sa nagakaigo nga disposisyon kag para sa pagpasaka sang kaso.
