ROXAS CITY – May isa ka compound sa Barangay 9, sining syudad nga nagaserbe nga boarding house sang mga badjao nga yari diri karon sa Roxas City.
Sa pagpadulong sang Bombo News team sa ilistaran sang mga badjao nga ginapanag-iyahan ni Kagawad Gina Roxas, nakita ang madamo nga mga kuwarto nga ila gina-ukupahan kaupod ang miyembro sang ila pamilya.
Sa pagpakig-angut sang Bombo Radyo kay Bebita, isa ka badjao nga isa ka semana pa lamang nga nakaabot sa syudad sang Roxas, ginpahayag sini nga gikan sila sa Basilan kag nakalab-ot sa Roxas City matapos ginpahibalo sila sang nag-una nga mga kalalakinhan nga badjao nga maayo ang ila mangin palangitan-an sa syudad.
Ginpanindugan sang ginang nga iban sa ila kaupdanan ang nagabaligya sang mga burluloy bilang palangabuy-anan samtang ang iban nga wala sang trabaho ang nagapangalimos.
Nahibaluan man nga nagabayad sang tag P30 tagsa ka tawo sa isa ka adlaw ang mga badjao sa gina-estaran nga hulot.
Ini ang ginapatihan rason nga nagatinguha ang mga badjao nga magpangita sang kuwarta kada adlaw sa diin kadam-an sa ila ang nagapangayo kayu kag nagapakalimos agud may mabayad sila sa gina-estaran kag may makaon.
Ginbali man sang ginang ang report angut sa pagpanakit sang mga badjao nga indi paghatagan.
Suno diri wala nila ginasugo ang mga kabataan nga magpakilimos kag masami nagatenir lamang sila sa ila balay.
Ginpanginwala ni Bebita ang nagalagaw nga report nga may tawo nga yara sa likod sang ila nga pagpakilimos.
