ROXAS CITY-Ginkompirmar sang isa ka Barangay Kagawad nga may yara sang 17 ka mga tripulante nga sakay sa tatlo ka mga sakayan pangisda gikan sa Estancia, Iloilo ang nagdungka sa Barangay Culasi, Roxas City.
Suno kay Barangay Kagawad Enrico Joseph nga ang 17 ka mga tripulante ang lunsay mga residente sang Sitio Luyo sang nasambit nga Barangay.
Gin-athag ni Joseph nga indi man Locally Stranded Individuals ukon LSI’s ang nasambit nga mga tripulante bangud madugay na sila nga nagapangisda sa bahin sang Estancia.
Ginpahayag pa sini nga naglisensya man ang mga tripulante sa mga barangay officials agud magpangisda kun sa diin nagtinir pa sila sang kapin sa 15 diyas sa kalalawran.
Ginpanindugan pa ni Joseph nga yara gid lamang sila sa kalalawran kag wala man sila nakapadulong sa takas sang Estancia.
Samtang agud mapasiguro, ginpakamaayo na lamang nga ipaidalom ang mga ini sa strict home quarantine.
Magapangusisa naman ang City Disaster Risk Reduction and Management Office ukon CDRRMO matapos nga wala nagkoordinar ang mga opisyales sang barangay natuhoy sa pagpangisda sang nasambitan nga mga tripulante.
