Ginakalipay sang mga barangay official sang Barangay Cagay, Roxas City ang inisyatibo ni President Ferdinand Marcos Jr. nga paglunsyar sang scholarship program para sa mga college students nga ginatawag nga “Bawat Barangay Makikinabang.”
Sa interview sang Bombo Radyo kay Kagawad Isidro Aragon sang Barangay Cagay, Roxas City, iya ginpahayag nga daku gid nga bulig ang nasambit nga scholarship para sa mapilian nga benepisyaryo, ilabi na sa pagbulig sa ila pang-adlaw-adlaw nga kinahanglanon.
Suno kay Aragon, ila pagatun-an ang mga pamaagi kag guidelines sa pag-implementar sang programa sa ila barangay agud masiguro nga husto kag patas ang pagpili sang mga makabenepisyo.
Nahibaluan nga sa idalum sini nga programa, ang lima nga mapilian nga benepisyaryo mahimo makabaton sang hasta ₱20,000 nga educational assistance nga magamit para sa tuition, school supplies, books, learning materials, kag transportation expenses.
Ginpasalig man sang natungdan nga mangin patas ang ila nga pagpili sang mga benepisyaryo nga nagakaangay kag deserve nga malakip sa programa para sa pagtuman sang ila mga handum.
