ROXAS CITY-Ginpasalig sang Punong Barangay sang Barangay Cagay sining siyudad nga hugot nga pagabantayan nga indi makabiya sa ila nga panimalay ang negosyante nga si Don Chiyuto.
Ini ang ginpasalig ni Punong Barangay Arturo Aragon Sr., sang mainterview sang Bombo Radyo.
Ginpahayag ni Aragon nga hugot sini nga pabantayan sa mga Barangay Peace Keeping Action (BPAT) ang balay kun sa diin nagpaidalom sa 14-day quarantine ang nasambit nga negosyante.
Suno kay Aragon nga hugot nga ginadumilian ang paguwa kag pagbaton sang bisita samtang ginapaidalom sa quarantine si Chiyuto.
Ginkakibot naman ni Aragon nga yara sa iya ginbakal nga balay sa Barangay Cagay si Chiyuto bangud nagadumdom ang opsiyal nga yara ini sa banwa sang Maayon.
Ginkompirmar naman sang opisyal nga indi pa makabig nga residente si Chiyuto sang amo nga barangay bangod kapin sa duha pa gid lamang ini ka bulan nga naga-istar sa nasambit nga balay.
Gin-abisohan naman sang CDRRMO si Aragon nga gilayon nga magpalab-ut sang impormasyon sa tion nga maguwa ukon magbaton sang bisita si Chiyuto.
