ROXAS CITY – Nabudlayan ang mga barangay sa Region 6 sa mga requirements sang Regional Oversight Committee agud madeklarar nga drug-cleared barangay.
Ini ang ginpahayag ni Philippine Drug Enforcement Agency (PDEA) Regional Director Alex Tablate sang mainterview sang Bombo Radyo Roxas.
Suno kay Tablate nga sa kabug-usan nga 4, 051 ka mga kabaranggayan sa rehiyon, 1,829 pa lamang ang nadeklarar nga drug-cleared barangay sang ahensiya.
Base sa datos sang ahensiya, 235 ka mga barangay pa lamang ang nadeklarar nga drug-cleared sa probinsiya sang Aklan; 357 sa Antique; 159 sa Capiz; 52 sa Guimaras; 976 sa Iloilo province magluwas pa sa 4 sa Iloilo City; kag 45 naman sa Negros Occidental magluwas pa sa isa ka barangay sa Bacolod City.
Aminado si Tablate nga madugay ang proseso sa pagdeklarar bilang drug-cleared sa isa ka barangay bangud sa mga requirements.
Bangud diri, padayon ang ahensiya sa ila nga Community-Based Rehabilitation Program kag Wellness and Recovery Program sa mga drug surrenderees agud dalayon na nga mapapas ang ilegal nga droga sa rehiyon.
