CULASI, ROXAS CITY – Isa sa mga problema sang Barangay Officials ang mga basura nga ginabilin sang mga nagapadulong sa circumferencial road, Barangay Culasi agud magtambay.
Sa interview sang Bombo Radyo sa Barangay Secretary sang Barangay Culasi nga si Mary Necesario, ginpahayag sini nga sila nga mga opisyales wala naga-untat sa pagpahanumdum sa mga tawo nga nagapadulong sa lugar nga kun mahimo mangin responsable sa ila mga basura.
Suno kay Necesario, masami nga nagadamo ang tawo sa lugar sumugod alas 5:00 sang hapon tubtob alas 9:00 sang gab-i.
Mahibaluan nga nakakuha sang atensyon sang kadam-an ang nagatumpok nga basura sa lugar kung sa diin isa sa mga problem sa lugar nga tubtob sa karun padayon nga ginatinguhaan sang mga opisyales agud matuldukan.
Bangud sini, nakasugtanan nga magpahamtang sang mga signage sa lugar kung sa diin nagapahanumdum nga indi magbilin sang mga basura.
