Madugay na nga problema sang mga pumuluyo ang nagatambak nga basura sa circumferential road sa bahin sang Brgy. Dayao, Roxas City.
Sa interview sang Bombo Radyo kay Punong Barangay Wenie Batuampo, iya ginpahayag nga ginasunod sang kuha ang amo nga mga basura apang pagkasunod nga adlaw ang may panibag-o naman nga tambak.
Suno kay Batuampo, mga umalagi kag kaiping nila nga barangay ang masami nga nagabilin sang basura sa amo nga dalan.
Pahayag pa niya, nagpakig-angot man ang ila talatapan sa barangay council sang kaiping nila nga barangay kag nagaplano nga pahamtangan sang Closed Circuit Television (CCTV) camera.
Nagapangabay man ang natungdan sa publiko nga dumulian na ang paghaboy sang basura sa nasambit nga circumferential road bangud may nakadesignar nga lugar kun sa diin ini nagakadapat ihaboy.
