Ginkalipay sang mga benepisyaryo ang pagbaligya sang bugas sa P20 kada kilo nga ginpatigayon sang Provincial Agriculturist’s Office sang Capiz subong nga adlaw.
Ang amo nga inisyatibo kabahin sang “Handog ng Pangulo: Serbisyong Sapat Para sa Lahat”, isa ka nationwide program sang Office of the President nga may tinutuyo nga mabuligan kag maserbisyohan sang gobyerno ang mga Pilipino.
Target sang programa ang mga vulnerable sector pareho sang senior citizens, persons with disabilities ukon PWDs, solo parents, minimum wage earners, mangunguma, mangingisda kag mga miyembro sang 4Ps.
Sa interview sang Bombo Radyo kay Mario Fequillo, benepisyaryo, iya ginpahayag nga daku nga bulig sa iya pamilya ang P20 kada kilo nga bugas bangod limitado ang iya kita bilang tricycle driver.
Suno kay Fequillo, ini ang una niya nga pagpila bilang senior citizen agud makabakal sang bugas sa mas barato nga presyo.
Para naman sa mga luyag mag-avail, kinahanglan magdala sang government-issued ID, lakip ang Senior Citizen ID, PWD ID, Solo Parent ID ukon iban pa nga balido nga ID.
