ROXAS CITY -Naglab-ut na sa 21 ka mga benepisyaryo sang “Bahayanihan Project” sang Capiz Police Provincial Office (CPPO) sa probinsiya sang Capiz.
Ini ang ginpabugal sang Provincial Director sang CPPO nga si Police Colonel Julio Gustilo Jr. sang mainteview sang Bombo Radyo.
Ginpahayag ni Gustilo nga 9 na ka mga panimalay ang natapos sang kapulisan kag natigayon na nga ma-turn over sa mga benepisyaryo.
Apang gin-athag ni Gustilo nga may iban pa nga padayon nga ginakay-o kag ginpatindog sang mga kapulisan.
Suno kay Gustilo nga gikan ang pundo sini sa pagbinuligay sang mga kapulisan sa probinsiya, gobyerno probinsiyal kag iban nga indibidwal nga nagapalab-ut sang donasyon kag bulig.
Gindugang pa sini nga may yara sang nakaigo nga validation antes ginhatagan ang mga benepisyaryo.
Samtang ginpalab-ot ni Gustilo sa mga nagahatag sang donasyon nga sa baylo nga kwarta, mga materyales sa pagpakay-o sang balay na lamang ang ihatag.
Suno pa sa kay Gustilo nga wala sini malauman nga madamo ang nagapalab-ut sang donasyon para sa nasambit nga proyekto rason nga masami madamo nga benepisyaryo ang naka-agom.
Matandaan nga 3 ka benepisyaryo nga gikan sa syudad, banwa sang Dao kag Dumarao ang nakatigayon na mahatagan sang panimalay sang tinalikdan nga adlaw
