ROXAS CITY – Ginbuhinan sang Department of Social Welfare and Development Office (DSWD) Regional Office 6 ang mga benepisyaryo sang Social Amelioration Program (SAP) sang ahensiya sa banwa sang Pontevedra.
Ini ang ginkompirmar mismo sang alkalde sang banwa nga si Mayor Esteban Evan ‘Dodoy’ Contreras sang mainterview sang Bombo Radyo.
Suno sa alkalde nga sandig sa una nga ginsumiter sang Pontevedra Municipal Social Welfare and Development Office (MSWDO), nagalab-ot sa 12, 417 households ang benepisyaryo sang amo nga ayuda kun sa diin 2, 141 diri ang Pantawid Pamilyang Pilipino Program (4P’s) beneficiaries kag 10, 276 ang mga non-(4P’s).
Apang matapos ang ginpatigayon nga balidasyon sang DSWD-6 suno sa alkalde, ginbuhinan ang mga benepisyaryo sang (SAP) sa ila banwa.
Suno sa alkalde nga base sa datos sang ahensiya, 10, 817 ka mga households lamang ang kwalipikado para sa nasambit nga ayuda kun sa diin 2, 141 diri ang (4P’s) beneficiaries kag 8, 676 ang mga non-(4P’s).
Wala suno diri sang may gin-iban sa mga (4P’s) beneficiaries kag ang mga non-(4P’s) lamang ang gin-ibanan sang 1, 600 ka mga households.
Suno kay Contreras nga ang mga low-income households gid lamang ang nangin kwalipikado para sa nasambit nga ayuda.
Apisar wala sang may ginhatag nga pat-od nga petsa, ginpahayag sang alkalde nga suno sa DSWD, matigayon nga mahatag ang nasambit nga ayuda sa mga kwalipikado nga benepisyaryo sa ilabing madali nga panahon.
