ROXAS CITY – Mahimo na maka-avail sang P6,000 kada bulan ukon P12,000 sa sulod sang duha ka bulan ang mga benepisyaryo sang Social Amelioration Program sa idalom sang Department of Social Welfare and Development.
Ini ang ginpahayag mismo ni Ms. Mae Rago Castillo, Information Officer sang DSWD Region 6 sang mainterview sang Bombo Radyo.
Suno kay Castillo nga ang mga benepisyaryo ang ginalakipan sang mga informal economy workers, Pantawid Pamilyang Pilipino Program beneficiaries, mga nagabusong kag lactating women, mga balay nga may senior citizen kag disabled, indigenous people, Overseas Filipino Workers in distress, sub minimum wage earners, kabulig sa balay, driver sang pedicab, tricycle kag Public Utility Vehicles, nastranded nga mga trabahador, occasional workers, operators sang sari-sari stores, mangunguma, mga empleyado nga apektado sang no work no pay, solo parent, underprivileged, homeless, kag iban pa nga miyembro sang vulnerable nga sektor sang komunidad.
Sa bahin naman sang mga 4Ps nga benepisyaryo, indi nila mabaton sang tingub ang P6,000 bangud may yara na sila nga daan sang ginabaton sa tagsa ka bulan.
Dugang pa ni Castillo nga magaserbe ini nga bulig sa mga benepisyaryo sa Western Visayas nga apektado sang krisis bangud sa coronavirus disease 2019.
Mahibaluan nga magasunod sila sa isa ka Memorandum of Agreement kaupod sang Local Government Unit (LGUs) sa diin sila na mismo ang magatatap sa tagsa ka mga kabanwahanan kag kabarangayan sa kun sin-o ang dapat yara sa listahan lakip na diri ang pagpirma sang form nga social amelioration card.
Nakadepende naman sa tagsa ka mga Local Government Unit ang assessment pag-abot sa mga kwalipikado ukon indi nga mga benepisyaryo sa nasambit nga programa.
Gin-athag naman ni Castillo nga igadul-ong na lamang sa tagsa ka balay sang benepisyaryo ang benepisyo nga ila makuha agud indi na ang mga ini makaguwa pa bangud man sa ginapatuman nga enhanced community quarantine sa ila lugar.
Samtang, igamonitor naman sang ila nga ahensya kun nahatag na sa mga natungdan ang mga benepisyo.
