-- ADVERTISEMENT --

Ginpabugal ni Department of National Defense Secretary Gilberto Teodoro Jr ang mga benepisyo nga ginalauman nga madala sang bag-o nga kasugtanan sa depensa sa tunga sang Pilipinas kag Australia, indi lamang sa pagpabaskog sang ikasarang sang militar kundi sa seguridad, pamuhunan kag pag-uswag sang ekonomiya sang pungsod.

Suno kay Teodoro, isa sa mayor nga tinutuyo sang kasugtanan amo ang pagpasimple sang mga proseso sa idalum sang nagaluntad nga Philippines-Australia Status of Visiting Forces Agreement ukon SOVFA.

Sa baylo nga mag-agi sa madamo nga mga tikang kag separado nga mga approvals antes magpatigayon sang isa ka aktibidad, ginalauman nga mangin mas madasig ang koordinasyon kag kooperasyon sa tunga sang duha ka pungsod.

Sa sini nga paagi, mabuhinan ang mga kinahanglanon nga proseso ukon ginatawag nga red tape, gani mangin madasig ang tingub nga aktibidad sang ila pwersa militar.

Dugang pa ni Teodoro, kabahin man ini sang pagpasanyog sang soberanya sang Pilipinas sa pagpanguna ni President Ferdinand Marcos Jr.

-- ADVERTISEMENT --

Gin-athag sang tiglikom nga ginalauman sang gobyerno ang tatlo ka mayor nga benepisyo gikan sa kasugtanan, nga direkta nga makabulig sa mga ordinaryo nga pumuluyo.