ROXAS CITY – Ginkalipay sang mga barangay tanod kag barangay health workers sa siyudad sang Roxas ang paglakip na sa ila sa kwalipikado nga makabaton sang Social Amelioration Program (SAP) sang Department of Social Welfare and Development (DSWD).
Sa paglibot sang Bombo Radyo News Team, nasiplatan kagab-i ang gintingob nga pwersa sang mga barangay tanod, barangay health workers kaupod sang mga opisyales sa barangay sa pagpatigayon sang hugot nga checkpoint samtang ginapatuman ang curfew sa idalom sang Enhanced Community Quarantine (ECQ) bangud sang coronavirus disease (COVID-19).
Suno kay Renaldo Imperial, barangay tanod sang Barangay Libas, dako ang ila pagpasalamat bangud sa paglakip na sa ila sa benepisyaryo sang amo nga ayuda apang panawagan sini nga kuntani mapadasig ang paghatag sini sa ila bangud masobra isa ka bulan na sila nga nagatrabaho bilang frontliners.
Ginpahayag pa sini nga wala pa man ang amo nga ayuda, padayon ang ila aktibo sa pagtrabaho para sa seguridad sang mga pumuluyo sa ila lugar.
Dako naman ang pagpasalamat ni Manang sa nasambit nga ayuda bangud suno diri dako ini nga bulig para sa ila ilabi pa nga apektado man ang ila tagsa ka mga palangabuhian.
Malipayon man ang mga BHW’s kag barangay tanod sa Barangay Dayao sa maayo nga balita nga ila mismo nahibaluan pinaagi sa Bombo Radyo.
Suno kay Manong Valdez nga dako nga bulig ang amo nga bulig-pinansiyal bangud may mga pamilya man sila nga nagakinahanglan.
