ROXAS CITY – Nagdangup na sa talatapan sang Criminal Investigation and Detection Group (CIDG) sa Campo Crame ang mga biktima sang illegal recruitment sa probinsiya sang Capiz, para i-reklamo si Ramilyn Andrade kag Korean boyfriend sini nga si Kim Tae Hyeong.
Ini ang ginkumpirma sa Bombo Radyo ni Doroteo Lafortaleza.
Magluwas sa CIDG nagdangup man sa Philippine Overseas Employment Administration (POEA) ang mga biktima kag ginpalab-ot ang pagpanunto ni Andrade sa nagalab-ot 263 nga mga indibiwal nga ginpromesahan nga buligan nga makatrabaho sa South Korea bilang factory workers, kabaylo sang daku nga kantidad nga ginbayad kay Andrade.
Ginpasalamatan man sang mga biktima ang Bombo Radyo bangud sa pagfacilitate nga makapadulong sila Manila kag makapangayo sang bulig sa abogado.
Nahibaluan nga kadam-an sa mga biktima sang illegal recruitment ang nagresign sa ila nga mga trabaho matapos ginpromesahan sang sweldo nga nagalab-ot sa P170,000 kada bulan.
