ROXAS CITY – Personal nga nagpadulong sa talatapan sang Bombo Radyo ang isa sa mga biktima nga ginpangluthang sang mga kalalakinhan sa kabukiran nga bahin sang Brgy. San Esteban, Pilar, Capiz.
Sa pahayag ni Angelo Orence, suno diri nga luyag nila bawion ang mga kagamitan kag kuwarta nga ginaalegar ginkuha sang mga suspek, sang nagluntad ang pagpang-harass sang armado nga grupo ni Randy Balasa.
Pagsaysay sini, nga sang tinalikdan nga adlaw, nagpadulong ini kag iya kaupdanan sa bukid bitbit ang isa ka sako nga bugas, nanari-sari nga kagamitan sa panghawan kag pagpatindog sang payag-payag, apang sa ila pagpadulong, ginsita ang mga ini sang asawa ni Randy nga gilayon man nagtuhaw ang kaoin anum ka mga armado nga kalalakinhan kag gin-isipan ang mga biktima agud magpalagyo antes ang pagpaulan sang bala.
Bangud sa kakugmat, suno diri nga nagdali-dali sila sa pagdalagan kag pagpalayo, kag nagkalabilin ang nasambit nga mga kagamitan kalakip na ang ginasudlan sang 50K nga kuwarta.
Natigayon ini nga mareport sa Pilar MPS kag gilayon nga ginpadulongan ang lugar apang wala na ang mga suspek kag nakita ang mga baseyo kag mga bala sang ginaalegar de-dose.
Ginaalegar man sang biktima, nga daw kaangay sa ginadampigan pa sang Municipal Agrarian Reform Office (MARO) – Pilar ang pamilya Balasa nga amu ang suno kay Orence, nagaambo’ sang nasambit nga duta nga panag-iya ni Perceval Vasquez nga ginpanubli sa mag-utod nga Silverio, nga isa diri amo ang ila kaupdanan.
