ROXAS CITY – Nagpadulong ang hubon sang mga bolante sang ukay-ukay sa istasyon sang Bombo Radyo agud ireklamo kag mahatagan sang sabat sa pagpahalin kag pagbawal sa ila nga mga taga-Pilar kag Carles Iloilo nga magbaligya sa Estancia, Iloilo.
Suno kay Amor Arrobang sang President Roxas, Capiz, wala nila maluyagan ang pagpahalin sa ila ginapuwestohan sa mandu ni Estancia Mayor Melina “Neneng” Requinto bangud daw kaangay nga ginpalayas ang mga ini nga may escort nga kapulisan.
Bangud diri, ginpakamaayo nalang sang mga ini nga magkuha sang pribado nga lugar nga ila puwestohan, apang sa gihapon ginpalayas ang mga ini.
Ginkasakit lang sang iya buot bangud kapin 26-anyos na ini nga nagabaligya sang ukay-ukay nga amu ang ila palangitan-an, kag sa karon lang nga administrasyon sila ginpahalin.
Suno pa sa mga tagreklamo nga ang market administrator amu ang utod ni Mayor Requinto.
Ginaalegar sang mga ini nga may nagahingabot sa ila nga mga tumandok sang amu nga lugar.
Ginpalab-ot man sang mga ini ang ila kahimatangan kay President Roxas Mayor Receliste “Tanoy” Escolin kag natigayon nga mahinyo kay Mayor Requinto nga kun mahimo pasugtan nga magbaligya ang mga ini bangud pag-abot sa kaso sang COVID-19, manubo na ang ila kaso.
Apang, sa karon 2 na ka semana nga wala sila ginapahanugutan nga magbaligya sa amu nga banwa.
Nahibaluan nga kada-Martes nga adlaw lang ang mga ini nagabaligya kag nagabayad sila sang P120 para sa lugar kag aminado nga sa ila nagapadulong ang mga pumuluyo agud magbakal sang ukay-ukay.
